Творчество И.А.Калинкина

      Очеркесь  явнозь пельксэнь пелькс. Эрьва пельксэнть яви эсензэ ветиця идеязо. Истя «Толонь  киява» очеркесь явозь ниле пельксэс. Снартано явомс эрьванть идеянзо. Васенцесэнть – те толонь киява войнав сыргамось; омбоцесь – героенть смелчинзэ, ёрокчинзэ невтемась. «Атакас омбоцеде каявомсто сон васенцекс кирнявтсь окопстонть, сыргавтынзе седе сыре солдатнэньгак. Сынь каявсть ятнэнь каршо. Лангозост ванозь, мельгаст тусть чияконь потыцятнеяк. Вейсэнь вийсэ гитлеровецтнэ се таркастонть ёртозельть удалов. Те лездась ротантень саемс веленть ды туемс икелев»;¹² колмоцесь – Днепрань чиресэ тюремась, В.С. Бахаревень ранявомадо; нилецесь – тиринь велев велявтомась.

      Очеркень  сёрмадомсто эрьва авторось саи  истят … лимят приемт, но эрьва  очерксэнть ёвтневи ломанде ды эрьва  сёрмадыцясь бажи невтемс эсензэ героензэ сеть шкатнесэ ды таркатнесэ, конатнесэ седе видестэ панжови  сонзэ обуцязо, сонзэ вановтозо эрямонть лангс. Ламо тарка тесэ саи героенть портретэзэ.

      Героесь сестэ ансяк карми живоекс, зярдо  очеркистэсь мусы ды тешкстасы сонзэ  эйстэ сеть ёнкстнэнь, конатнень  кувалт героесь явови лиятнень эйстэ: те – келест, кортавксост, рунгост, чамаст, мизолксост, сельме варштавксост.

      «Велень эрицянть Никифор Тарасович Бахаревень лияназонь тюссо прячерь, валдо  сельме Вася цёрынезэ чинь-чоп эрсесь луга лангсо. Озыль козоньгак ды яла ваныль тикшеденть сэтьместэ  порниця лишметнень лангс».¹³ Самай те шкастонть вишка цёрыненть превс чачсь покш мель: «зярдо касы покшсто, весе виензэ путсы – карми улеме эсензэ лишмезэ!», кодамояк тевде эзь пеле цёрась. Те невти сонзэ обуцястонзо пек явовикс тешкс – цёрась видестэ ютась сенень, мезе ульнесь мельсэнзэ, валонзо эзть явовт тевензэ эйстэ.

      Авторось  пек вадрясто невтизе сеньгак, кодамо пси вечкема палсь те героенть мештесэ тиринь ёнксонтень. Войнань  стака тюрема шкастояк эзинзе стувтне  сон тиринь таркинензэ. «Ине лей, мон  ялгань марто, киненьгак а макстан. Идетян тонь, идезь ули монь эйкакшчинь Пьяна лейнемгак. Сон, нама, ламоксть тондеть седе вишкине. Ялатеке лей. Ялатеке ломантненень канды кеняркс. Секс вечкса истя, кода тонь, ине Днепра, вечкить чиреват эрицятне, ине масторонок весе ломантне».¹⁴

      Самай неть тиринь таркатнеде ледстнематне лездыльть эрзянь цёрантень стака шкатнестэ. Эште вейке лездыця сонзэ туртов ульнесь тиринь кельсэ моротне. Зярдо шнылизь «мазый, седейс оймиця» эрзянь келенть, конатнень валтнэнь гайтест кирявты ойме, Бахаревнень теевиль мельспаро. «Чамаванзо сравтовиль лембе мизолкс, седейстэнзэ чевтестэ лисить валонзо:

      – Монгак, бути кадован живстэ эсень  Оржаньбуесэнь лецтнеметь карман».¹⁵

      Неть  весе саевкстнэ видестэ невтить  Бахаревень, кода алкуксонь патриотонть, кона пси вечкемасо корты тиринь мастордо ды анок тюреме сонзэ кисэ, апак кавтолдо максомс эрямонзояк.

      Эзь пеле те кеме вий цёрась ятонь леднемадо, сон содась – сон тюри эсензэ Родинанзо кисэ.

      Аволь аламо тарка очерксэнть саи пейзажось. Сонзэ эйсэ Калинкин путсь анеявикс, васенце варштавксонь коряс, смусть. Пертьпельксэнь невтемась вадрясто лезды панжомс очеркенть смустензэ, героенть потмоежонзо, невтемс те или тона событиятнень.

      «Сеть кизэнь читнестэ Оржаньбуе велесь эрясь  прок бутрав, тусто лувсо. Неявсь, чиськак  вельксэзэнзэ стякшныль кода-бути а  мельсэ, мезде-бути нусманясто арсезь. Удалганзо чудиця Пьяна лееськак, мерят, ёмавтызе эсь ведьбрянзо икелень гайтенть ды цитнеманть. Кинзэ ветясь састо, потмурасто.

      Пертьпельга сравтозь паксятнесэ кенериця сюротне  стакасто лымбаесть вармань лексемадонть».¹⁶ Тень каршо путови те саевксэсь:

      «Эрьва  чинь талноматнень учомасо эрясть Бахаревтнеяк».¹⁷

      Содави, весенень тенень чумокс ульнесть фашистнэ, конат каявсть тиринь моданть лангс. Весе пертьпельксэсь авардсь тень кувалт. Весе апарочинть, нужачинть сон кирдсь эсензэ лангсо.

      Войнань стака иетне прядовсть, тень марясь пертьпельксэськак. Полавтовсь сонзэ  чамалицязо: мизолды цветиця лёмзёрксось; жойнить сиянь ведьбрят, норовжорчонь морот, цёковонь вешкемат.

      Нама, И. Калинкин очерксэнть кортась аволь ансяк главной геройденть, эзь явт сонзэ пертьпельксэнь эрямонть эйстэ. Героесь сюлмавозь лия ломань марто, конат седеяк вадрясто панжить сонзэ образонзо.

      Войнань стака китнева ютамсто Бахаревень вакссо свал ульнесь вадря ялгазо Иван Горшков, Груневский лейтенантось. Низэ, Мария Михайловна, эйкакшонзо.

      Авторось  теке тев совавты главной героенть кортамонзо, яви те приемонтень покш тарка. Кортавксозо героенть велень, чарькодевиця.

      Неть  кортавкстнэ максыть очеркентень эрявикс настроения. Вансынек:

      – Стака ули теть, Мария, ниле эйкакштнэнь марто. Ялатеке кеман: цидярдат, карман теть сеетьстэ сёрмань кучомо. Тонгак – монень.

      – Истя минь свал карматано улеме вейсэ  ды вейкенек-вейкенек туртов лездамо, – поладынзе мирденть валонзо Мария.¹⁸

      Неть  валтнэнь ловнозь сельметь пешкедить  чапамо сельведьсэ, кодамо явома!

      Эряви тешкстамс, кодамо кельсэ сёрмадозь весе очеркесь. Содави, сонзэ сёрмадызе алкуксонь поэт, кона содасы валонть питнензэ, видестэ мусы сонзэ тарканзо. «Очеркенть ловномсто марязь тарксян: сёрмадыцянть мештьсэ чави поэтэнь седей. Теке лисьмапрясто чудикерьксэкс, нелаксезь чудить эйстэнзэ мазый валтнэ: «Прок кодамо-бути вельть эрявикс тевень топавтомо ине нармунькс ливти ды ливти шкась. Мельганзо кепетиця велямосонть сон салы эрицятнень эрямосонть шканть. Вана истя читне туить вейкень пес, моданть лангс ломантнень таркас кадовить сонзэ тевензэ ды лемезэ, конат валовить вейке кувака киксэкс.

      Бути  сон валдо, лембе, сестэ эйстэнзэ лиятнень седейс таргави эждиця рисьме, кенярксты сынст, лезды кияваст  парсте молеме».¹⁹ И.А. Калинкин эсензэ очерксэнзэ ваны ломанень образонть, секскак сонзэ очеркензэ весе кармить улеме портретнойть. И.А. Калинкинэнь портретной очеркензэ лиснесть «Эрзянь правда» газетанть лопанзо лангс. Ды сеедьстэ весе материалонть эйсэ панжови вейке ломанень образ. Те а корты седе, буто цела произведениясонть ансяк вейке действующей лиця, эйстэст эрсить зярыя. Истя, «Жойни сонзэ седей морозо» очерксэнть, кона алтазь Никул Эркайнень, зярыя геройть: те поэтэсь сонсь, Тимофей, эрзянь цёрась, Анна тейтересь, эрзянь поэтт ды писательть.

      Очеркень  сёрмадомс авторось вешни истят  геройть, конатнеде алкукс ули мезе сёрмадомс. Истя «Сезезь моро» очерксэнть И.А. Калинкин ёвтни Надежда Васильевна Киржайкинадо кода поэтессадо, корты  сонзэ творчествадонзо. Пачти те сонзэ тевенть пек вадрясто, секс мекс сон малавикс эстензэ сёрмадыцянть туртов.

      Эрсить  истят ломанть, конат пингень  вейке пельксэнть печтить седе неявиксстэ. Те шкастонть истятнэ, кода толбандят, палыть ды перькаст лиятненьгак эждить седе лембестэ, казить тенст седе ламо валдо. Мейле сынь уцяскань кияваст туить седе тов, емить пингень менель енксонть экшс. Мерят, арастькак моданть лангсо».²⁰

      Истямо  валсто Калинкин ушодызе ёвтнеманзо те чевте седей, эсензэ тевень содыця ломаненть эйстэ. Оймень лембе марто корты сёрмадыцясь эсензэ героинядонть, явовиця вечкема марто ушодызе сонзэ трицянзо-кастыцянзо.

      Ломаненть потмо ёжозо пек стака ды асодавикс, эрьванть сон эсензэ.

      Эсензэ  очеркензэ эйсэ И.А. Калинкин макссь аволь аванть фотографиянзо, а теизе  сонзэ художественно-публицистичной образонзо.

      Авторось  пек видестэ, чарькодевикстэ панжи  се обстановканть, косо те ломанесь кассь. «Тевень вечкиця тетятнень-аватнень лангс ванозь, Киржайкинэнь семиясост эйкакштнеяк кассть аволь кольняйкс. Сынь топавтсть кудоютконь ламо тевть. Теньсэ эсь прянзо парсте невтсь Надя. Потявтсь скал, шлясь-нардась кудо киякст, вансь сондензэ вишкине ялаксонзо ды сазорканзо. Кизна покштнэнь марто вейсэ лисниль паксяв. Тесэяк ульнесь козонь путомс кедьвийтнень».²¹

      Те  саевксэсь невти сень, кода кассь  тейтересь, те макссь сонзэ обуцянстэнь  эрявикс ёнкс – а велявтнемс пря  стакачитнеде, макссть тензэ чарькодемс: ансяк лезэвстэ эрямось канды ломанентень лезэ.

      Очеркенть эйс авторось секе тев совавты  эсензэ арсеманзо, предположениянзо, конатнень  вельде кемевти ловныцятнень те или  тона арсемасонть. Примеркс: …Надежда Киржайкина сонсь кармась эйкакшонь тонавтомо Атяшевань райононь Селища велень школасо… Эсензэ сельмсэ нейсь ломантнень стака эрямост. Кой-кить эзть машто ловномояк, сёрмадомояк.

      Те  сувов эрямось од тейтеренть седеяк пелевтизе: ансяк ломанесь, кона покш содамочинь валдосонть неи васов  икелев, шождалгавтсы эсь эрямонзояк, лезды лиятнененьгак…»²²

      Те  ёнксось макссь И.А. Калинкинэнь  очеркензэ туртов явовикс стилевой ёнкс.

      Авторось  пек вадрясто макссь анализ Киржайкинань поэтической творчестванзо коряс. Тешкстынзе сонзэ теманзо-идеянзо, толковинзе, мекс неть тематне сайсть покш тарка сонзэ поэзиясонть, ёвтнесь сеньгак, мезе арси ловныцясь неть строчкатнеде.

      Те  невти сень, буто И.А. Калинкин апак пеле эсензэ валонзо кувалт кортась  весе ловныцятнеде, ёвтнесь сынст мелест-арсемаст, ёвтнесь поэтессанть арсемадонзояк. Те ёнксось максы пек покш вий сонзэ очеркензэ туртов.

            «Од шкасто ульнесь

            Стака эрямот. –

            Эзить некшнекшне

            Тон валдо чить.

            Чаво кудосо

            Эйкакшт трить ськамот,

            Чить-веть важодезь,

            Касмост учить.

            Содан, эсь пачкат

            Лиясто арсят,

            Кода ве ено

            Эрясть сынь, –

            Молян ли витьстэ,

            Теян ли парсте.

            Мекс сёрма теть

            Нурька кучинь.

      Неть  строчкатнесэ маряви тиринь авань домка  седей рискс. Сонзэ вельде ловныцянтень чарькодеви аволь ансяк васоло эриця  раське ломанень кисэ мелявкс. Парсте чарькодевить сёрмадыцянть талноманзояк.

      И.А. Калинкин очеркень весе ёнкстнэнь саемадост  башка, вадрясто важоди художественной литературань келень изобразительной средстватнень марто. Очерксэнть явовить пек ламо сравненият: кода толбандот палыть, теке эрзянь жойниця моро, кода тиринь велень коштось; эпитетт: тантей лецтнемат, сувов эрямо, жойниця моро. Неть приемтне лездыть седе вадрясто сёрмадозенть чарькодемантень, сынь седе видестэ невтить сеть образтнэнь, конатнеде корты сермадыцясь.

      Весе  неть ушодозь приемтнэ вастневить И.А. Калинкинэнь лия очерксэнзэяк. Сермадыцясь пек домкасто панжинзе эрьва героенть образонзо, теке марто маштсь эрьванть явомс лиятнень эйстэ. Эрьва очеркенть Иван Алексеевич пештизе анеявикстешкссэ, конат совить эрьва ловныцянть оймес ды кадовить тозонь амадстевиця толнэкс. 
 
 
 
 
 
 
 
 
 
 
 
 
 
 
 
 
 
 
 
 

      Меельце валось 

      И.А. Калинкин теи покш лезкс кода литературанть, истя жо журналистиканть туртов. Тень невтить сонзэ стихотворениянзо, поэманзо, очеркензэ.

      Максозь курсонь тевесь ашти кавто пельксстэ. Васенцесэнть ваннови И.А. Калинкинэнь очеркензэ проблемно-тематической ёнксост. Пек ламо Калинкин сёрмадсь войнадо, малав весе очеркензэ алтазь Ине войнань геройтненень.

      Ёвтнесь сон Покш Игнатовань ёнксонь ломантнеде, Советской Союзонь Геройтнеде, конат  эрямонь апак жаля тюрсть немецтнень каршо. Очеркензэ кандыть истят лемть: «Сон свал мартонок» алтазь А.В. Астаповнень, «Толонь киява» ёвтневи В.Н. Бахаревде, «Спиридоновонь тештензэ» очерксэнть келейстэ, домкасто панжови Славань орденэнь лементь кандыцясь. Истя жо Калинкин сёрмадсь П.В. Еделеевде, П.М. Куманёвдо, П.Я. Ямушевде.