Өтініш

Өтініш

 

      Өтініш  – мекеме басшысының атына  жазылып, белгілі бір тілек-өтінішті  білдіретін құжат.

      Өтініштің  құрылымы:

• мекеменің толық атауы;
• басшының қызметі, атағы, аты-жөні;
• құжаттың атауы;
• мәтіні;
• жазылған мерзімі;
• өтініш иесінің қолы.

     Өтініш – ресми іс қағаздарының бірі. Ол қызметке орналасқанда, демалыс сұрауда, қандай да бір көмек сұрауда, жұмыстан шығарда, бір қызметтен екінші бір қызметке ауысуда және тағы басқа жағдайларда жазылады.

      Ең алдымен,  қағаздың оң жақ бұрышына кімге  және кімнен екені жазылады./барыс және шығыс септіктерінде/. Сосын қағаздың ортасына «Өтініш» деген сөз және азат жолдан өтініштің мәтіні жазылады. Соңында күні, айы, жылы көрсетіліп, өтініш иесінің қолы қойылады.

      Өтінішке  мекеме басшысы бұрыштама қойғаннан кейін, сол өтініш бойынша бұйрық шығарылады. Өтініш таза қағазға, кейде арнайы бланкке жазылады.

 

 

 

Өтініш үлгілерімен  танысыңыз.

                                                   

                                                    «Адал» фирмасының басшысы

                                  О.Жұбанов мырзаға

     Өскемен  қаласы, Әуезов даңғылы,

                                             15-үй, 45-пәтерде тұратын

                                  Досанова Сәуледен

 

Өтініш

 

      Мені 2009 жылдың 15 ақпанынан бастап лаборант қызметіне қабылдауыңызды сұраймын.

 

14.02.2009 ж.                                             (қолы)________________

 

 

 

 

                                                  

                                                 

                                                   Өскемен қаласындағы

                                                              № 26 қазақ орта мектебінің

директоры А.Ыдырысқызына

                                                             Қазақ тілі пәнінің мұғалімі

                                                             Алтын Жақсылыққызынан

 

Өтініш

 

      Сізден  осы жылғы 15 наурыздан бастап  отбасы жағдайыма байланысты  кезектен тыс демалыс беруіңізді  сұраймын.

 

14.03.2009 ж.                                                (қолы)_______________

 

 

 

 

 

 

 

 

 

 

 

                                    Д.Серікбев атындағы Ш Қ Т У-дың

                                       ректоры проф.С.С Қуанбаев мырзаға

қазақ тілі кафедрасының аға оқытушысы

Ж..Исаевадан

 

Өтініш

 

       Мені 2009 жылғы 15 ақпаннан бастап өз  еркіммен қазақ тілі  пәнінің  оқытушысы қызметінен босатуыңызды  сұраймын.

 

12.02.2009 ж.                                                     (қолы) _____________

 

 

 

 

                                                         «Құрмет» ААҚ-ның

                                                              Б.Сағындықов мырзаға

                                                                     менеджер Р.Жандосовадан

 

 

Өтініш

 

      Сізден  отбасы жағдайыма байланысты 50 000 (елу мың) теңге көлемінде материалдық көмек көрсетуіңізді өтінемін.

 

12.03.2009 ж.                                                       (қолы)_____________

 

 

                                    

                                        Әл-Фараби атындағы ҚҰУ

Шығыс филологиясы факультетінің

                                                    деканы проф.А.Оспанов мырзаға

                                       оқытушы М.Берікұлынан

 

 

Өтініш

 

     Сізден  денсаулығыма  байланысты 2009 жылғы  9 ақпаннан бастап 15 күнге кезектен тыс демалыс беруіңізді сұраймын.

 

08.02.2009 ж.                                                         (қолы)____________

 

 

 

Тапсырмалар топтамасы. Берілген сөз тіркестерін пайдаланып, өтініш үлгілерін жаз.

 

Кімге               Ә.Б.Сағатов мырзаға

                    А.К.Айдарова ханымға

                    «Адал» ААҚ-ның басшысы А.Темірбеков  мырзаға

                    «Айболит» малдәрігерлік дәріханасының                                               меңгерушісі З.Ерназарова ханымға

                        Мектеп директоры Ж.Маратовқа

 

Кімнен           Тіркеу бөлімінің басшысы К.Омаровадан

                    Мал фельдшері К.Сариевадан

                    Оқытушы Н.Оспановтан

                    Лаборант С.Ивановадан

 

2009 жылдың 12 қаңтарынан  бастап 

2009 жылғы 12 қаңтардан  бастап

• 10 күнге
• 1 айға
• 2 аптаға
• 1 жылға

 

 

Отбасы жағдайыма байланысты

Денсаулығыма байланысты

Басқа қызметке ауысуыма байланысты

 

 

Оқытушы қызметіне қабылдауыңызды

Кезекті демалыс беруіңізді

Кезектен тыс демалыс беруіңізді

Материалдық көмек көрсетуіңізді

Астана қаласына ауыстыруыңызды

Лаборант қызметінен босатуыңызды

Іссапарға жіберуіңізді

Жалақымды көтеруіңізді                              өтінемін (сұраймын)

 

 

 

Сұхбатпен танысыңыз.

 

• Сәлеметсіз бе?
• Қайырлы таң!
• Менің аты-жөнім Сапаров Марат Есенұлы. Мен кеше мал фельдшері қызметіне орналасу үшін өтініш жазғанмын. Менің өтінішім қаралды ма екен?
• Иә, сіздің өтінішіңіз қаралды. Сіз мал фельдшері қызметіне қабылдандыңыз. Жұмысқа ертеңнен бастап кірісіңіз.
• Рахмет.

 

Сөздер мен  сөз тіркестерін қолданып, өтініш мәтінін жазыңыз.

1. Өтінемін, өз еркіммен, мені, босатуыңызды, қызметінен, бастап, лаборант, 2009 жылдың 5 ақпанынан.

2. 12 наурызынан, осы жылдың, бастап, пайдалануға, сұраймын, рұқсат  етуіңізді, кезекті еңбек демалысымды, маған.

3. Қабылдауыңызды, мені, осы жылғы, сұраймын, мал фельдшері,  жетекші маман, 15 сәуірден, қызметіне,  бастап, ретінде.

4. Сұраймын, 2009 жылғы, 1 мамырға дейін, менің, ұзартуыңызды, мерзімін, еңбек келісімімнің.

 

 

 

Тапсырма. Өтініштің қатесін түзетіңіз.

                                                       Семей қаласындағы

                                                     № 135 қазақ орта

                                                                мектебінің директорына

                                                         Асылбеков мырзаға

Физика пәнінің мұғалімі

                                                             Қадырова Самалға

Өтініш

 

     Сізге отбасы  жағдайыма байланысты осы жылғы  14 ақпанынан бастап 15 күнге ақысыз кезекті демалыс беруге сұраймын.

 

12.02.2009

Өтініш иесі   /қолы/

 

Үй тапсырмасы. Сұхбатпен танысып, сол бойынша Ә.Асқарбеков туралы әңгімелеңіз.

 

• Сәлеметсіз бе?
• Жақсы, кіріңіз, отырыңыз.
• Рахмет.
• Аты-жөніңіз кім?
• Асқарбеков Әнуар Асқарбекұлы.
• Сізді қандай қызмет орны қызықтырады?
• Менің мамандығым –мал фельдшері. Сондықтан мен мал фельдшерінің бос қызмет орнына орналасқым келеді.
• Сіздің мамандығыңыз бойынша жұмыс өтіліңіз (стаж) бар ма?
• Иә, мен «Айболит» малдәрігерлік дәріханасында 5 жыл лаборант қызметін атқардым.
• Малдәрігерлік дәріханадан неліктен шығып кеттіңіз?
• Мекен-жайымның өзгеруіне байланысты.
• Түсінікті. Жұмыс орныңыздан ұсынысхатыңыз бар ма?
• Иә, міне... Танысуыңызға болады.
• Ұсынысхатыңыз өте жақсы екен. Біздің үміткерлерге қоятын талаптарымызға толық сай келесіз. Сондықтан біз сізді фирмаға қабылдаймыз.
• Мен өте қуаныштымын. Онда маған өтініш жазу керек шығар?
• Иә, қазір фирма меңгерушісінің атына өтініш жазыңыз. Сосын құжаттарыңызды кадрлар бөліміне өткізіңіз. Ал ертеңнен бастап жұмысқа кірісуіңізге болады.
• Рахмет. Сау болыңыз.
• Сау болыңыз. Сізге сәттілік тілейміз.